Category Uncategorized

Сара Стојановска и Сандра Стојановска се ученички од 9-4 одд. кои поради својот сестран уметнички талент, по покана на кумановската поетеса Јаготка Томовска, од 27- 29 септември, учествуваа на 4 Меѓународен литературен фестивал во Глобовац, Црна Гора. Нашите ученички имаа можност да се дружат со поети и уметници од Црна Гора, Србија, Хрватска, Италија и Македонија. Рецитираа свои лични творби, твореа, сликаа на платно, се дружеа со деца поети и уметници, но и се прошетаа во Подгорица и на Острог. Оваа ликовно -книжевна колонија оваа година се организираше под мотото „Преку култура до пријателство“, а главен организатор е Здружение на уметници „Визија“. Нашите ученички достојно го претставија нашето училиште, град и Држава и се поканите во мај да учествуваат на Литературен фестивал во Калабрија, Италија. Голема благодарност до поетесата Јаготка Томовска, која никогаш не не заборава и до родителите на нашите ученички за укажаната доверба!

Од Меморандум за соработка со Општина Куманово, преку проектот Општествено корисна работа,  на 3 октомври го добивме и петтиот асистент во нашето училиште. Образовните асистенти се задолжени за работа и придружба на учениците со ПОП за време на престојот во училиштето. Благодарност до тимот на Општина Куманово и МОН!

„Безбедни училишта“ е проект кој и оваа година продолжува во соработка со Сектор за безбедност при СВР Куманово. Првата активност веќе започна со реализација. Со предавање на тема „Безбедност во сообраќај“ инспекторите ги запознаа учениците од 2 и 3 одделение со правилата кои треба да ги почитуваат како учесници во сообраќајот. Кому да се обратат кога имаат проблем, која е разликата меѓу полицаец и сообраќаец, како да влегуваат и излегуваат од автобус, како да минуваат улица, кога можат да возат велосипед на пат, кога можат да се возат на предно седиште во автомобил и на слични прашања учениците добија одговори, но даваа и своите предлози. Корисно предавање за безбедност на нашите ученици!

Добредојде на нашите првачиња во Детската светска организација по повод Детската недела им приреди и „Битолска млекара“! Чоколадно млекце за да пораснат, распоред на часови за да се почувствуваат одговорни, налепници и друг школски прибор беа само дел од подароците кои понеделнички директорката Лидија Пешевска им ги подели на најмалите ученичиња! Да сте здрави, успешни и весели наши најмали ученици и нека ви е честит приемот во Детската организација!

На 27.9.2018г во училишната медијатека се одржа првиот состанок на Ученичка заедница. Состанокот беше организиран и воден од педагогот Сашка Стаменковска и на истиот на демократски начин беше избрано раководството на Ученичката заедница. Кандидатите прво се претставија и им објаснија на членовите на ученичката заедница зошто треба токму нив да ги изберат за претседатели. Со тајно гласање, секој член на ученичка заедница го даде својот глас за машки и женски кандидат од предложените. За претседател беше изберен Давид Додевски од 9-1 одд., за потпретседател Мелани Кузмановска од 8-3 одд., а за член Мила Јовановска од 8-5 одд. Колективот на ООУ „Кочо Рацин“ Куманово им посакува среќна, плодна и успешна работа на новото раководство на Ученичката заедница!