Archives January 2019

Дека наставниците од нашето училиште постојано ги надградуваат своите способности е доказ и големата посетеност на денешната обука ,,Откривање и работа со талентирани и надарени ученици“. Предавачи беа: проф.др Љупчо Кеверески, проф. Јован Хаџиевски и психолог Дивна Јанкова, сите од Македонска асоцијација за надарени и талентирани. Обуката беше спроведена со цел подобрување на компетенции во процесот на откривање, работа и поддршка на развојот на надареноста кај надарени и талентирани како и креирање на ефикасни институционални решенија и примена на позитивни практики кои се дел од современите европски образовни институции. Квалитетна обука, со многу дискусија, анализа, посочување на практични примери и сознанија.

Во соработка со Црвен крст на Р. Македонија-Општинска организација Куманово во нашето училиште е формиран Училишен клуб на Црвен крст составен од ученици од осмо и деветто одделение. На 5 октомври беше одржан првиот состанок-дисеминација за учениците од деветто одд. од страна на младите волонтери на Црвен крст. Учениците преку презентација и разговор се запознаа со основањето и работата на Црвен крст, негови цели и задачи, принципи на работа. Целта е да се поттикнуваат и негуваат хуманите вредности кај младите и да се зголемува и проширува бројот на млади волонтери на Црвен крст. Во текот на учебната година следуваат разни предавања, активности, работилници, вежби и учество во разни акции организирани од страна на Црвен крст.

Детската недела која се одбележи со низа активности на 5.10.2018 г. заврши со прекрасна манифестација, организирана по повод прием на првачињата во Детската организација! Во присуство на гостинчиња од градинката „Ангел Шајче“, клон „Пчелка“, родители, ученици наставници, првачињата ја положија свечената заклетва. Во сите подрачни училишта беше подготвена мала манифестација од страна на постарите другарчиња. Драги првачиња, честит прием во Детската организација!

Како дел од активностите на Детска недела беше реализирано цртање во дворот на училиштето,игри без граници, а во  опуштена и пријатна атмосфера во градината на училиштето се одржаа „Детски лирски треперења“. Уживавме во пејзажна, патриотска, хумористична, љубовна поезија, но имаше и социјална по која е познат нашиот патрон, поетот Кочо Рацин. Браво ученици и наставници, повторно го докажавте вашиот тален и креативната работа со учениците!

Сара Стојановска и Сандра Стојановска се ученички од 9-4 одд. кои поради својот сестран уметнички талент, по покана на кумановската поетеса Јаготка Томовска, од 27- 29 септември, учествуваа на 4 Меѓународен литературен фестивал во Глобовац, Црна Гора. Нашите ученички имаа можност да се дружат со поети и уметници од Црна Гора, Србија, Хрватска, Италија и Македонија. Рецитираа свои лични творби, твореа, сликаа на платно, се дружеа со деца поети и уметници, но и се прошетаа во Подгорица и на Острог. Оваа ликовно -книжевна колонија оваа година се организираше под мотото „Преку култура до пријателство“, а главен организатор е Здружение на уметници „Визија“. Нашите ученички достојно го претставија нашето училиште, град и Држава и се поканите во мај да учествуваат на Литературен фестивал во Калабрија, Италија. Голема благодарност до поетесата Јаготка Томовска, која никогаш не не заборава и до родителите на нашите ученички за укажаната доверба!

Од Меморандум за соработка со Општина Куманово, преку проектот Општествено корисна работа,  на 3 октомври го добивме и петтиот асистент во нашето училиште. Образовните асистенти се задолжени за работа и придружба на учениците со ПОП за време на престојот во училиштето. Благодарност до тимот на Општина Куманово и МОН!