Archives 2017

На 24.11.2017г. во присуство на голем број гости, родители, ученици и пријатели, беше одбележан Денот на училиштето. Свежо цвеќе на бистата на нашиот Патрон положија Градоначалникот и голем број делегации од Општината. Свечената приредба се состоеше од неколку точки: Писма од Кочо Рацин во придружба на модерен балет, обраќање од Директорката, Лидија Пешевска,  хор-„Пијте смело“, оркестар- „Џипси меџик“ во придружба на класичен балет, рецитал од извадоци од поезија на Кочо Рацин, две точки од одделенска настава и македонско оро. Присутните беа воодушевени од приредбата, по која следуваше коктел.

Прекрасен настан, со прекрасни гости, со прекрасни ученици, со прекрасни наставници, со прекрасна Директорка!
На сите ученици, наставниции вработени во ООУ „Кочо Рацин“ Куманово, нека ни е честит Патрониот празник!

На 22.11.2107г. пред вработените и родителите, педесетина наградени ученици на ликовен и литературен конкурс распишан по повод Денот на училиштето од библиотека „Фиданка“, приредија вистинско задоволство и за око, и за уво, и за срце. Уживавме во прекрасната поезија, во преубавите цртежи и во музиката на Ана и Леа. Голема благодарност за големиот интерес за оваа манифестација, оргнизирана од библиотекарката Ивана Ѓорѓиевска. Како што доликува, нашите ученици чекорат по стапките на нашиот Патрон, Кочо Рацин- најголемиот великан на македонската поезија!

По повод Патрониот празник на 21 11.2017г се реализира прва ликовна колонија под организација на ликовниот педагог Далибор Јовановски. На колонијата учествуваа пет основни училишта со најталентираните ученици и нивните ментори. Оваа година учениците сликаа на тема „Есен во ноќта“, со темперни бои на платно. Дружењето и креативната енергија, придонесоа амбиетот да биде прекрасен. Успешна колонија, која се надеваме ќе стане традиција за нашето училиште! Уметничките дела се изложени во училиштето. Повелете посетете не и уживајте во убавината која само уметниците можат да ви ја приредат!

Со спортски натпревар, денеска започна празнувањето на Патрониот празник. Со резултат 6:5 наставниците ја славеа победета. Натпреварот беше полн со неочекувани пресфрти во играта.И двете екипи го дадоа својот максимум, но победија поискусните. Браво за спортскиот дух и на учениците и на наставниците!

Светли и топли простории, убава атмосфера за работа и дружење е новата слика во ПУ с.Биљановце. На 17.11.2017г. учениците и нивните учителки Маја Лазаревска и Снежана Трајковска со пригодна претстава го прославија реновирањето на столаријата во нивното училиште. Ваков потфат не ќе беше можен без финансиската помош на фирмите „Биљановце компани“ и „Ники транс“. На прославата беа присутни претставниците од Сектор за образование на Куманово и стручната служба од нашето училиште. Добрата соработка со родителите и бизнис секторот се секогаш за доброто на нашите ученици. Голема благодарност до донаторите!