Извештај за организиран и реализиран проект Збратимени училишта „Синав Колеџ“ Анталија, Р.Турција и ООУ „Кочо Рацин“ Куманово во учебната 2015/16 година
Проектот Збратимени училишта „Синав Колеџ“ Анталија, Р.Турција и ООУ „Кочо Рацин“ Куманово беше организиран и реализиран врз основа на потпишаниот меморандум за соработка помеѓу двете училишта во месец февруари 2015 на идеја на директорката на ООУ „Кочо Рацин“ Куманово, Лидија Пешевска, и врз основа на изготвениот проект во рамките на годишната програма на ООУ „Кочо Рацин“ за учебната 2015/16 година. Реализацијата на проектот беше во етапи предвидени во изготвениот проект. Сите предвидени активности и подготовки беа успешно реализирани за пречекот на гостите од збратименото училиште „Синав Колеџ“ Анталија – тринаесет ученици, две професорки по англиски јазик и директорката на основното училиште.
Учениците имаа можност да се запознаат и да комуницираат виртуелно преку Skype неколку седмици пред посетата на Куманово.
Почитуваните гости пристигнаа на 22.05.2016 со воодушевување од топлото гостопримство и добредојде од страна на нашето Училиште, учениците и нивните родители. Следеше реализација на планираните заеднички активности предвидени со агендата. Учениците беа прифатени и сместени кај децата домаќини и го поминуваа слободното време со семејствата домаќини.
На 23.05.2016 гостите и домаќините учествуваа во завршната манифестација на ПМИО во нашето училиште со пригодна програма, по што следеше посета на часови по англиски јазик со учество во интерактивни игри и следење на ИКТ презентации на англиски јазик изготвени од страна на ученици од седмо одделение. Завршната манифестација на ПМИО беше проследена од страна на неколку медиуми, пришто и посетата на гостите од „Синав Колеџ“ Анталија беше соодветно медиумски покриена.
На 24.05.2016 – Св. Кирил и Методиј, беше реализирана еднодневна екскурзија во Битола и Охрид за гостите и домаќините- учениците, училишниот тим наставници по англиски јазик и помошникот директор. Посетата на музејот посветен на Мустафа Кемал Ататурк им причини огромна радост и задоволство на гостите. Сите беа воодушевени и од убавините и кутурно-историските споменици и обележја на град Охрид. Екскурзијата претставуваше идеална можност за дружење, запознавање со и прифаќање на различни културни вредности.
На 25.05.2016 гостите и домаќините беа поканети на средба од страна на градоначалникот, г-дин Зоран Дамјановски, во зградата на Општина Куманово. На средбата гостите и домаќините ги прими Градоначалникот заедно со г-дин Жико Крстевски, началникот на Секторот за образование при Општина Куманово. Средбата помина во срдечна атмосфера во разговор за различните форми на соработка на општина Куманово со повеќе општини од Република Турција. Следеше и посета на знаменитостите на град Куманово.
По четири прекрасно поминати денови со безброј моменти за помнење децата и родителите ги испратија гостите на 26.05.2016. Разделбата беше емотивна и трогателна со желби децата што поскоро повторно да се видат и другаруваат.
Целите на проектот беа постигнати. Соработката ќе продолжи и во следната учебна година во поинаква форма.
Координатор на проектот за ООУ „Кочо Рацин“ – Куманово, Анита Димовска
Директор – Лидија Пешевска