Посета на ученици од ООУ „Кочо Рацин“ на „Синав Колеџ“ Анталија

Посета на  ученици од ООУ „Кочо Рацин“ на „Синав Колеџ“ Анталија

На 19.02.2015 година ООУ ,,Кочо Рацин” Куманово потпиша Меморандум за соработка  со ,,Синав “ Колеџ од Анталија. Набргу  добивме покана да ги посетиме и да бидеме нивни гости. Посетата на Анталија се оствари во период од 21-24 април 2015г.Овој проект на збратимување беше координиран од  Димовска Анита и Коцевска Соња-наставнички по англиски јазик под раководство на директорката Лидија Пешевска. По одржани родителски средби ги одредивме учениците кои ќе патуваат надвор од границите на нашата држава. На 24 април во раните утрински часови заминавме со авион за Анталија. Патувањето со авион беше вистинско доживување за учениците. На аеродромот во Анталија бевме пречекани од наставничката Хава А. Сваќаровска – која беше наш домаќин. Во училиштето бевме пријатно изненадени од дочекот. Домаќините имаа подготвено торта со знамиња на двете држави и се беше украсено со жолто-црвени балони и знаменца на Република Македонија. Децата-Домаќини имаа цртежи со пораки за добредојде испишани на македонски јазик. По пригодна закуска и запознавање секое дете беше превземено од родителите-домаќини и одведено кај нив дома. Наредниот ден започна со посета на часовите по англиски јазик кај ученици од различни одделенија. Учениците заеднички преку интерактивни игри на смарт табли се натпреваруваа во своите знаења. По појадокот бевме прошетани низ училиштето. На првиот кат имаше базен во кој учениците имаат задолжителни часови по пливање. Следуваа сала за кошарка, игралиште за фудбал, лизгалиште за хокеј, кабинет по музичко опремен со инструменти, училница за балет, за боречки вештини и на последниот кат имаше телескоп со кој наставникот по физика ни овозможи да ги видиме сончевите дамки. Училиштето имаше голема кантина во кое учениците јадеа неколку оброци во текот на денот. Во попладневните часови училиштето имаше организирано свеченост по повод Ден на државноста и Ден на детето. На оваа свеченост учествуваа и нашите ученици со изведба на две македонски ора. Учениците беа облечени во традиционални македонски носии и домаќините се сликаа со нив. На оваа свеченост пригоден говор одржа и нашата директорка Лидија Пешевска. Нејзините воведни зборови таа ги кажа на турски јазик што наиде на одобрување и огромен аплауз од присутните. Директорите на двете училишта разменија благодарници за соработка и пригодни подароци. По свеченоста сите бевме поканети на продажниот базар на кој имаше изобилие од традиционални јадења и пијалоци приготвени од родителите. Презадоволните ученици заминаа дома со своите домаќини по завршување на оваа свеченост. Третиот ден имавме организирана групна екскурзија со посета на знаменитости и културно-историски споменици на Анталија. Тргнавме од старата чаршија каде што секој си купи по некој сувенир за спомен. Потоа се прошетавме на пристаништето каде што децата се фотографираа. Направивме мал одмор во паркот со фонтани, лулашки и лизгалки, па заминавме на познатите Дуден водопади. Го посетивме Минијатурниот град каде што имаше макети од сите позначајни историски градби кои постојат во Република Турција. Не помалкѕ интересна беше и посетата на големиот Аквариум. Нашето доживување беше забележано од новинарска екипа од нашиот град која будно го следеше секое наше движење. Исполнети со позитивна енергија, впечатоци и чувство на задоволство, среќа и радост се збогувавме со нашите добри домаќини со договор за скоро видување и добра забава во Република Македонија.

Учениците од Синав Колеџ ќе бидат наши гости од 22-26 април 2016г.